ജനപ്രതിനിധിയേയും,സ്ക്കൂൾ ജീവനക്കാരനേയും കേസിൽ ഉൾപ്പെടുത്തിയതിൽ പ്രതിഷേധിച്ചു.

മേപ്പയ്യൂർ : മേപ്പയ്യൂർ ഗവ. ഹയർ സെക്കണ്ടറി സ്കൂളിലെ പാർലമെന്റ് തെരഞ്ഞെടുപ്പുമായി ബന്ധപ്പെട്ട് മേപ്പയ്യൂർ ടൗണിലുണ്ടായ സംഘർഷത്തെ തുടർന്ന് , മേപ്പയ്യൂർ ഹയർ സെക്കണ്ടറി സ്ക്കൂൾ ജീവനക്കാരൻ അയ്യറോത്ത് മോഹൻ ദാസിനെയും കോഴിക്കോട് ജില്ലാ പഞ്ചായത്ത് പയ്യോളി ഡിവിഷൻ മെമ്പർ വി.പി ദുൽഖിഫിലിനെയും, കേസിൽ ഉൾപ്പെടുത്തിയ പോലീസ് നടപടിയിൽ യു.ഡി.എഫ് മേപ്പയ്യൂർ പഞ്ചായത്ത് കമ്മിറ്റി പ്രതിഷേധിച്ചു.

സ്ക്കൂൾ പാർലമെന്റ് തെരഞ്ഞെടുപ്പ് ദിവസം സ്ക്കൂളിൽ ലീവായിരിക്കുകയും, സംഘർഷ ദിവസം തന്റെ വ്യക്തിപരമായ ആവശ്യത്തിനു വേണ്ടി എ.ടി.എം കൗണ്ടറിൽ നിന്നും പണം പിൻവലിക്കാൻ ഫുഡ്പാത്തിലൂടെ നടന്നു പോയതായിരുന്നു മേപ്പയ്യൂർ ഹൈസ്ക്കൂൾ ജീവനക്കാരനായ അയ്യറോത്ത് മോഹൻ ദാസ് എന്നും സംഘർഷ വിവരമറിഞ്ഞ്  എത്തിച്ചേർന്നതായിരുന്നു ജില്ലാ പഞ്ചായത്ത് മെമ്പർ ദുൽഖിഫിൽ എന്നും   യു.ഡി.എഫ് മേപ്പയ്യൂർ പഞ്ചായത്ത് കമ്മിറ്റി പ്രസ്താവനയിൽ പറഞ്ഞു.  

അന്യായമായി ചുമത്തിയ കേസ് പോലീസ് പിൻവലിക്കണമെന്നും ഇല്ലെങ്കിൽ പോലീസ് സ്റ്റേഷനു മുൻപിൽ സത്യാഗ്രഹ സമര മുൾപ്പെടെയുള്ള പ്രതിഷേധ സമരം സംഘടിപ്പിക്കുമെന്നും യു.ഡി.എഫ് കമ്മിറ്റി അറിയിച്ചു. ചെയർമാൻ പറമ്പാട്ട് സുധാകരൻ അധ്യക്ഷനായി. ഡി.സി.സി സെക്രട്ടറി ഇ അശോകൻ യോഗം ഉദ്ഘാടനം ചെയ്തു. കൺവീനർ എം.കെ അബ്ദുറഹിമാൻ, ബ്ലോക്ക് കോൺഗ്രസ്സ് പ്രസിഡന്റ് കെ.പി രാമചന്ദ്രൻ, മണ്ഡലം കോൺഗ്രസ്സ് പ്രസിഡന്റ് പി.കെ അനീഷ്, പഞ്ചായത്ത് മുസ്ലിം ലീഗ് പ്രസിഡന്റ് കമ്മന അബ്ദുറഹിമാൻ, ജനറൽ സെക്രട്ടറി എം.എം അഷറഫ്, ട്രഷറർ കെ.എം.എ അസീസ് ,കെ.പി വേണുഗോപാൽ, കെ.എം കുഞ്ഞമ്മത് മദനി, അന്തേരി ഗോപാലകൃഷ്ണൻ, കെ.പി മൊയ്തി എന്നിവർ സംസാരിച്ചു.