MEPPAYURNEWS * NEWSINDIALINE.COM 

^{www.newsindialine.com a venture of Democrat}

മാർച്ച് 1 ന് ആറാട്ട് മഹോത്സവം സമാപിക്കും.

മേപ്പയ്യൂർ: മേപ്പയ്യൂർ ശ്രീകണ്ഠനശാല ക്ഷേത്രത്തിൽ ആറാട്ട് മഹോത്സവം കൊടിയേറി. കാലത്ത് 9 മണിക്ക് ക്ഷേത്ര അധികാരികൾ, ഉത്സവ കമ്മിറ്റി ഭാരവാഹികൾ, മറ്റു ഭക്തജനങ്ങൾ തുടങ്ങിയവരുടെ സാന്നിധ്യത്തിലായിരുന്നു,കൊടിയേറ്റം. ചടങ്ങുകൾക്ക് മേൽശാന്തി മൊളേരി ഇല്ലം സന്ദീപ് നമ്പൂതിരി മുഖ്യകാർമ്മികത്വം വഹിച്ചു.ഭക്തജന സംഗമം നിഷാറാണി പയ്യോളി ഉദ്ഘാടനം ചെയ്തു. എൻ.പി.പ്രശാന്ത് കുമാർ അധ്യക്ഷനായി.

തിങ്കൾ വൈകുന്നേരം ക്ഷേത്ര വനിതാ സമിതി അവതരിപ്പിക്കുന്ന മെഗാ തിരുവാതിരയും കളരിപ്പയറ്റ് പ്രദർശനവുമുണ്ടാകും. ചൊവ്വ വൈകുന്നേരം സാംസ്കാരിക സദസ്സ് ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻ്റിംഗ് കമ്മറ്റി ചെയർമാൻ മുനീർ എരവത്ത് ഉദ്ഘാടനം ചെയ്യും. മേപ്പയ്യൂരിലെ മുതിർന്ന ഡോക്ടർ പി മുഹമ്മദ്, ഹരിത കർമ്മ സേനാംഗങ്ങൾ, ആശാ പ്രവർത്തകർ, ജീവകാരുണ്യ പ്രവർത്തകർ എന്നിവരെ ആദരിക്കും. ഗ്രാമ പഞ്ചായത്ത് മെമ്പർ പ്രസന്നകുമാരി ചൂരപ്പറ്റ മീത്തൽ, രംഗീഷ് കടവത്ത് എന്നിവർ പ്രസംഗിക്കും. ഫെബ്രുവരി 25ന് തായമ്പക, കോമരം കൂടിയ വിളക്ക്, ഗാനവിരുന്ന് എന്നിവ നടക്കും. 26 ന് ക്ഷേത്ര ചടങ്ങുകൾക്ക് പുറമെ ഗ്രാമോത്സവവും ഉണ്ടാകും. 27 ന് മലബാർ മെഡിക്കൽ കോളജിൻ്റെ സഹകരണത്തോടെ സംഘടിപ്പിക്കുന്ന മെഗാ മെഡിക്കൽ ക്യാമ്പ് മേപ്പയ്യൂർ ഗ്രാമപഞ്ചായത്ത് പ്രസിഡണ്ട് ടി.നിബിത ഉദ്ഘാടനം ചെയ്യും. അക്ഷരശ്ലോക സദസ്സ്, പ്രസാദ ഊട്ട്, കാഞ്ഞിലശ്ശേരി വിനോദ് കുമാറിൻ്റെ തായമ്പക, കളമെഴുത്തുംപാട്ടും എന്നിവയും നടക്കും. 28 ന് ഇളനീർ വെപ്പ്, തിരുവായുധം എഴുന്നള്ളത്ത്, താലപ്പൊലി, കുളിച്ചാറാട്ട്, രുധിരക്കോലം, പുന്നാട് പൊലിക അവതരിപ്പിക്കുന്ന നാടൻ കലാമേള എന്നിവയും ഉണ്ടാകും. മാർച്ച് 1 ന് കാലത്ത് നാഗത്തിന് കൊടുക്കൽ ചടങ്ങോടെ ആറാട്ട് മഹോത്സവം സമാപിക്കും.

എൻ.പി പ്രശാന്ത് കുമാർ ചെയർമാനും വിജീഷ് കവിതാലയം ജനറൽ കൺവീനറുമായ ആഘോഷ കമ്മറ്റിയും പി.കെ.രാധാകൃഷ്ണൻ പ്രസിഡണ്ടും പി.സുരേഷ് ബാബു ജനറൽ സെക്രട്ടരിയുമായ ക്ഷേത്രപരിപാലന കമ്മറ്റിയുമാണ് ആഘോഷ പരിപാടികൾക്ക് നേതൃത്വം നൽകുന്നത്.